کورونا نے پوری دنیا کو اپنی لپیٹ میں لے لیا ہے اور اس کے پھیلاؤ کا دائرہ روز بروز وسیع تر ھوتا جا رھا ہے۔ اس درمیان مغربی ایشیا کی عرب حکومتوں نے کورونا کا پھیلاؤ روکنے کے لئے نئے اقدامات و تدابیر کا اعلان کیا ہے۔
بغداد سے موصولہ رپورٹ کے مطابق حکومت عراق نے عالمی ادارہ صحت ڈبلو اچ او کی سفارش پر اعلان کیا ہے کہ سبھی مقدس روضے، کورونا کے بحران کے خاتمے تک، ملکی اور غیر ملکی زائرین کے لئے بند رھیں گے۔ عراق کی وزارت صحت نے اعلان کیا ہے کہ ملک میں بائیس نئے کیس سامنے آنے کے بعد کورونا سے متاثرین کی مجموعی تعداد ایک ھزار چار سو اور اموات اٹھہتر ھو چکی ہیں۔
بحرینی حکومت نے بھی اعلان کیا ہے کہ کورونا سے بچاؤ کی نئی تدابیر اختیار کی گئی ہیں اور دارالحکومت مناما کے قریب، کورونا کے مریضوں کے لئے ایک سو تیس بیڈ کے خصوصی اسپتال کا انتظام کیا گیا ہے۔
قابل ذکر ہے کہ بحرین ایک چھوٹا سا ملک ہے جس کی کل آبادی پندرہ لاکھ افراد پر مشتمل ہے۔ اس چھوٹے سے ملک میں کورونا وائرس سے متاثرین کی تعداد ایک ھزار پانچ سو بائیس ھو چکی ہے جن میں سے سات افراد موت سے ھمکنار ھوئے ہیں۔
اردن میں بھی اوقاف اور دینی امور کی وزارت نے اعلان کیا ہے کہ کورونا وائرس کا پھیلاؤ روکنے کے لئے رمضان المبارک میں ملک کی سبھی مساجد بند رہیں گی اور نماز جماعت پر پابندی برقرار رھے گی۔
اردن میں اب تک کورونا سے تقریبا چار سو افراد متاثر ھو چکے ہیں جن میں سے سات کی موت واقع ھو گئی ہے اور دو سو پندرہ افراد صحتیاب ھونے میں کامیاب رھے ہیں۔
سعودی عرب کی وزارت صحت نے بھی گزشتہ چوبیس گھنٹے میں کورونا سے متاثرین کی تعداد میں چار سو پینتس افراد کے اضافے کا اعلان کیا ہے۔ سعودی عرب میں کورونا میں مبتلا افراد کی تعداد پانچ ھزار تین سو انھتر اور اس وائرس سے مرنے والوں کی تعداد تھتر بتائی گئی ہے۔
متحدہ عرب امارات کی وزارت صحت نے بھی اعلان کیا ہے کہ کورونا کے چار سو بارہ نئے مریضوں کا پتہ لگنے کے بعد کورونا سے متاثرین کی تعداد چار ھزار نو سو ترانوے ھو چکی ہے۔
اس دوران لبنان کی وزارت صحت نے بھی ملک میں مزید نو افراد کے کورونا میں مبتلا ھونے کی خبر دی ہے۔ لبنان کی وزارت صحت نے بتایا ہے کہ ملک میں کورونا میں مبتلا افراد کی تعداد اکتالیس اور مرنے والوں کی تعداد اکیس ھو چکی ہے۔
قطر کی وزارت صحت نے بھی اعلان کیا ہے کہ چوبیس گھنٹے میں کورونا کے ایک سو ستانوے نئے مریضوں کا پتہ لگنے کے بعد کورونا سے متاثرین کی تعداد تین ھزار چار سو اٹھائیس اور مزید انتالیس افراد کے صحتیاب ھونے کے بعد کورونا سے صحتیاب ھونے والوں کی تعداد تین سو تھتر ھو چکی ہے۔
قابل ذکر ہے کہ پوری دنیا میں کورونا سے بیس لاکھ سے زائد افراد متاثر اور ایک لاکھ چھبیس ھزار سے زائد موت سے ھمکنار ھو چکے ہیں۔

Add comment