ایران کے وزیر خارجہ نے کہا ہے کہ بغداد میں دھشت گردانہ کارروائیوں اور نیتن یاھو کے بیانات کا مقصد صرف ایران سے مقابلہ آرائی ہے تاہم ایران کے خلاف ذلت آمیز سازشی منصوبے ناکام ہوجائیں گے۔
اسلامی جمھوریہ ایران کے وزیر خارجہ محمد جواد ظریف نے ٹوئٹ کرکے بغداد کے دھشت گردانہ حملوں کی شدید الفاظ میں مذمت کی ہے۔
انھوں نے بغداد میں ہونے والے دھشت گردانہ بم دھماکوں سے لے کر نیتن یاھو کی چاپلوسی اور جوتوں کو چومنے کو ایک چال قرار دیا تا کہ ایران کا مقابلہ کرنے کیلئے امریکی صدر کو پھنسائیں اور امریکی جانوں اور سرمائے کو ضائع کریں ۔
محمد جواد ظریف نے کہا کہ نیتن یاھو کی انتہائی مایوسی کے باوجود ، ایران کے خلاف ذلت آمیز منصوبے ایک بار پھر ناکام ہوں گے۔
اس سے قبل ایران کی وزارت خارجہ کے ترجمان خطیب زادے نے بغداد خودکش دھماکوں کے متاثرین کے اہل خانہ سے اظہار ہمدردی کرتے ہوئے جاں بحق افراد کی مغفرت اور زخمیوں کی جلد شفا یابی کی دعا کی۔
خطیب زادے نے کہا کہ عراق میں تکفیری دھشت گردی پھر سے سر اٹھا رہی ہے۔ انھوں نے کہا کہ اس کا مقصد عراق کو نا امن بنانا اور اس ملک میں غیر ملکی مداخلت کا زمینہ ہموار کرنا ہے۔
ایران کی وزارت خارجہ کے ترجمان کا کہنا تھا کہ اسلامی جمھوریہ ایران، ماضی کی طرح اب بھی عراق کی ہر طرح سے مدد کرنے کے لئے تیار ہے۔
واضح رہے کہ جمعرات کے روز بغداد میں الطیران اسکوائر میں ہونےوالے دو خودکش بم دھماکوں میں 35 افراد جاں بحق اور 110 سے زیادہ زخمی ہوئے ۔
عراق کی وزارت داخلہ کے ترجمان نے اپنے بیان میں کہا کہ پہلے حملے میں خودکش حملہ آور نے خود کو بیمار ظاہر کرنے کی کوشش کی اور جیسے ہی لوگ اس کی مدد کے لئے آگے بڑھے تو اس نے اپنی کمر پر بندھے دھماکہ خیز مواد کو اڑا دیا۔
ان کا کہنا تھا کہ تھوڑی دور پر کھڑے دوسرے دھشت گرد نے جب یہ دیکھا کہ لوگ زخمیوں کی مدد کے لئے جمع ہوگئے ہیں تو اس نے بھی خودکش دھماکہ کر دیا۔

Add comment