اسلامی جمھوریہ ایران کی ذولفقار ۹۹ مشترکہ فوجی مشقوں کے دوسرے دن متعدد میزائلوں اور تکنیکوں کا کامیاب تجربہ کیا گیا۔
ایران کی ذوالفقار نناوے فوجی مشقوں کے ترجمان ایڈمیرل شھرام ایرانی نے بتایا کہ فوجی مشقوں کا اصل مرحلہ جاری ہے جس میں سطح سمندر پر بحری یونٹوں نے اپنے اھداف کو میزائلوں سے نشانہ بنایا۔ ایڈمیرل شھرام ایرانی نے مزید کہا کہ فوجی مشقوں کے اس مرحلے میں بحری جہاز نے کروز میزائل نصر فائر کرکے فرضی دشمن کے ٹھکانوں کو کامیابی کے ساتھ نشانہ بنایا اور انھیں منہدم کر دیا-
اسی طرح ذوالفقار ننانوے مشترکہ فوجی مشقوں کے دوسرے دن ساحل سے سمندر میں مار کرنے والے قادر میزائل کو بھی آزمایا گیا اور اس نے بھی پوری کامیابی کے ساتھ اپنے ہدف کو نشانہ بنایا۔
ایرانی فوج کی سہ روزہ ذوالفقار ننانوے نامی مشترکہ فوجی مشقوں میں بری بحری اور فضائی یونٹوں کے جوانوں نے حصہ لیا ہے اور یہ مشترکہ فوجی مشقیں آبنائے ھرمز کے مشرقی کنارے سے شروع ہو کر شمالی بحر ہند کے دوھزار مربع کلومیٹر کے علاقے میں دس ڈگری کے مدار میں انجام پا رھی ہیں۔
بیس لاکھ مربع کلومیٹر کے دائرے میں ہونے والی ان فوجی مشقوں کا نعرہ " دفاعی طاقت کے سائے میں پائیدار سلامتی" ہے اور یہ ہفتے کے روز تک جاری رہیں گی۔
ان فوجی مشقوں کے پہلے دن خاتم الانبیاء ایئر ڈیفینس ہیڈ کواٹر کے ریڈار سسٹم نے انتہائی بلندی پر تیز رفتاری کے ساتھ پرواز کرنے والے فرضی دشمن کے ڈرون طیارے کا پتہ لگانے کے بعد اسے شلمچہ نامی ترقی یافتہ میزائیل سے نشانہ بنا کر تباہ کردیا تھا۔
ذوالفقار ننانوے فوجی مشقوں کے دوران چھوٹے سے چھوٹے سائز میں پرواز کرنے والے ہدف کو بھی فوجی مشقوں کے علاقے میں داخل ہونے سے روکنے اور انھیں اپنے کنٹرول میں لے کر مطلوبہ مقام پر اتارنے کی مشقیں بھی انجام دی گئیں۔ ان فوجی مشقوں کے دوران بیرونی طاقتوں کے جہازوں اور ڈرون طیاروں کو مشقوں کے علاقے سے دور رھنے کی ہدایت دی گئی اور انھیں کئی انتباہ بھی جاری کیے گئے۔
اس کے علاوہ ایرانی فضائیہ کے ایف فور بمبار طیاروں نے بھی سمندر میں متحرک اہداف کو نشانہ بنانے کی کامیاب مشقیں بھی انجام دیں ۔

Add comment