اسلامی جمھوریہ ایران کی حکومت کے ترجمان نے کہا کہ تہران، جمھوریہ آذربائیجان اور آرمینیا کے درمیان جنگ کے خاتمے اور دھشتگردوں کی علاقے میں آمد و رفت کو روکنے سے متعلق ہر قسم کے اقدام کی حمایت کرتا ہے۔
اسلامی جمھوریہ ایران کی حکومت کے ترجمان علی ربیعی نےصحافیوں کے ساتھ گفتگو کرتے ہوئے کہا کہ ہم جمھوریہ آذربائیجان اور آرمینیا کے درمیان جنگ کے خاتمے اور لوگوں کے قتل کو روکنے کے لئے ہر قسم کے اقدام کی حمایت کریں گے، اس لئے کہ علاقے میں دھشت گردوں کا وجود اور کسی بھی ملک کے ذریعہ خطے میں دھشت گردوں کی موجودگی اس ملک کے لئے نقصان دہ ہوگی۔
انھوں نے کہا کہ قرہ باغ میں جو بھی فیصلہ لیا جاتا ہے تنازعات میں شامل تمام فریقوں کی اس میں شمولیت ضروری ہے۔
ایران کی حکومت کے ترجمان نے مزید کہا کہ ہم امن کی سمت ایک قدم کی حیثیت سے ناگورنو اور قرہ باغ خطے میں دشمنیوں کے خاتمے کا خیرمقدم کرتے ہیں اور اپنے ہمسایہ ممالک سے بین الاقوامی قوانین اور علاقائی سالمیت کے احترام پر مبنی سنجیدہ مذاکرات میں حصہ لینے اور کوئی بھی اقدام جو جنگ بندی کی راہ میں رکاوٹ کا باعث بنے اس سے اجتناب کرنے کا مطالبہ کرتے ہیں۔
علی ربیعی نے شہریوں کے قتل پر گہری تشویش اور افسوس کا اظہار کرتے ہوئے ان واقعات کی روک تھام کی ضرورت پر زور دیا اور کہا کہ خطے اور ہمارے ممالک کے عوام کو پہلے سے کہیں زیادہ امن و امان کی ضرورت ہے۔

Add comment