عراقی فوج اور عوامی رضاکار فورس کے جوانوں نے مشرقی تلعفر میں پیشقدمی جاری رکھتے ھوئے، متعدد علاقوں کو دھشت گرد گروہ داعش کے قبضے سے آزاد کرا لیا ہے۔
بغداد میں عسکری ذرائع نے بتایا ہے کہ عوامی رضاکار فورس حشد الشعبی کے جوانوں نے مشرقی تلعفر میں اھم علاقوں العبرہ کو داعش کے قبضے سے آزاد کرانے کے بعد اپنی پوزیشن مستحکم بنا لی ہے۔
دوسری جانب عراقی فوج کے سریع الحرکت دستے نے موصل شھر میں پیشقدمی کرتے ھوئے، دریائے دجلہ کے مغربی ساحلی علاقے حاوی الجوسق کو آزاد کرا لیا ہے۔
عراقی کی سریع الحرکت فوج اس وقت الجوسق نامی محلے کی جانب پیشقدمی کر رھی ہے۔
اس رپورٹ کے مطابق عراقی فوج موصل کے بین الاقوامی ھوائی اڈے کے اطراف کے علاقے کو دھشت گردوں سے پاک کر رھی ہے اور طیران نامی محلے میں داخل ھو گئی ہے جھاں متعدد دھشت گردوں کو گرفتار بھی کر لیا گیا ہے۔
عراقی فوج کے ایک دستے نے عطشانہ کی پہھاڑیوں پر بھی اپنا کنٹرول قائم کر لیا ہے جبکہ یرموک، طرفب اور تل رمان کو بھی داعش کے قبضے سے آزاد کرا لیا گیا ہے۔
ایک اور اطلاع کے مطابق عراقی فضائیہ نے جنوب مغربی موصل کے ساحلی علاقوں میں دھشت گردوں کے ٹھکانوں پر بمباری کی ہے جس میں ستر کے قریب دھشت گرد ھلاک ھوگئے ہیں۔
داعشی دھشت گردوں نے مغربی موصل میں جاری فوجی آپریش کے بعد علاقے سے فرار ھونا شروع کر دیا ہے اور وہ عام لوگوں کے گھروں کو آگ لگا کر علاقے سے بھاگ رھے ہیں۔
عراق کے وزیراعظم حیدرالعبادی نے مغربی موصل میں فوج کو عام شھریوں کی جان و مال کے تحفظ کے حوالے سے خصوصی ھدایات جاری کی ہیں۔
وزیراعظم حیدر العبادی کے دفتر سے جاری ھونے والے ھدایت نامے میں تمام سیکورٹی دستوں کو حکم دیا گیا ہے وہ داعش کے خلاف جنگ کے دوران عام شھریوں کے تحفظ پر خاص توجہ دیں۔
عراقی وزیراعظم نے داعش کے خلاف جنگ میں عراقی فوج اور عوامی رضاکاروں کو قربانیوں اور شجاعت و بھادری پر ان کی تعریف بھی کی ہے۔
قابل ذکر ہے کہ عراقی فوج نے گزشتہ اتوار سے مغربی موصل کو داعش کے قبضے آزاد کرانے کے لیے بھرپور فوجی آپریشن کا آغاز کیا ہے جس کے دوران موصل کے بین الاقوامی ھوائی اڈے سمیت متعدد علاقوں کو آزاد کرا لیا گیا ہے۔

Add comment