عراق کے نئے وزیر اعظم اور اسپیکر پارلیمنٹ نے ملک میں اصلاحات کے پروگرام کے آگے بڑھانے کا عزم ظاھر کیا ہے۔
وزیراعظم نامزد ھونے کے بعد محمد توفیق علاوی نے اسپیکر پارلیمنٹ محمد الحلبوسی سے ملاقات کی اور مختلف مسائل کے بارے میں تبادلہ خیال کیا۔
اسپیکر محمد الحلبوسی کے دفتر سے جاری ھونے والے بیان کے مطابق اس ملاقات میں ایک ایسی حکومت کے قیام پر اتفاق کیا گیا جو عوامی مطالبات کی روشنی میں ملک میں اصلاحات کے عمل کو تیزی کے ساتھ آگے بڑھا سکے۔
عراق کے صدر برھم صالح نے ھفتے کی شب محمد توفیق علاوی کو ملک کا نیا وزیراعظم نامزد کرتے ھوئے انھیں کابینہ کی تشکیل کا حکم دیا تھا۔
محمد توفیق علاوی نے اپنے فیس بک پیج پر قوم سے وعدہ کیا ہے کہ وہ کابنیہ کی جلد از جلد تشکیل کے لیے تمام توانائیاں بروئے کار لائیں گے۔
نئے وزیر اعظم توفیق علاوی دوھزار تین سے اب تک دو بار عراق کے رکن پارلیمنٹ رھے جبکہ وزیراعظم نوری المالکی کابینہ میں وزیر ٹیلی مواصلات کے عھدے پر بھی کام کرچکے ہیں۔
قابل ذکر ہے کہ عراق کے وزیر اعظم عادل عبدالمھدی نے ملک میں جاری مظاھروں کے بعد گزشتہ سال تیس نومبر کو اپنے عھدے سے استعفی دے دیا تھا تاھم آئین کے تحت نئے وزیراعظم کے تقرر تک بطور نگران وزیراعظم کام کر رھے ہیں۔

Add comment